Qaratsap immikkoortuini qaap tulliullu nalaaniittuni puigortunngorneq pissusilersornikkut allannguutitalik

Qaratsap immikkoortuini qaap tulliullu nalaaniittuni puigortunngorneq pissusilersornikkut allannguutitalik, inuup kinaassusaanik pissusaanillu allannguutinik annertuunik nassataqartarpoq. Qaratsap immikkoortuini qaap tulliullu nalaaniittuni puigortunngorneq, qaratsakkut nappaatinut ataatsimoortunut, qaratsap immikkoortuini qaap tulliullu immikkoortuata salliup nalaaniittunut sunniuteqartunut, ataatsimut taaguutaavoq.

Ersiutit

Ersiutit malunnarnerpaat tassaapput pissusilersornerup kinaassutsillu allanngornerat. Inuup killiliisinnaassusia pissusissamisoortunullu malussarsinnaassusia sanngiilligajupput. Ass. nerivallaarlunilu imerpallaartoqarsinnaavoq imal. tunguarnitsutorusunneq annertuserujussuarsinnaavoq.

Inunnik allanik paasinnissinnaaneq ajornerulersarpoq, inuttaatalu inuttut inooqataanermi nalinginnaasumik akuerisaasunik soqutigisaqannginnera malunnarluni. Ajuallatsitsinissaq eqqarsaatiginagu eqqarsaatit suugaluit anninneqarsinnaasarput. Nappaammut ersiutit, tarnikkut nappaatit ilaannut assingusinnaapput, taamaammat qaratsap immikkoortuini qaap tulliullu nalaaniittuni puigortunngorneq suussusersiuminaakkajuppoq.

Imminut ilisimaarineq nappaateqarnermillu nassuerutiginninneq annikillisimanngikkunik peerutivissimasarput. Inuttaata napparsimanini paasisinnaanngilaa inunnullu allanut qanoq sunniuteqarnera paasisinnaanguttaaq.

Pissusilersornikkut kinaassutsikkullu allannguutit aallaqqaammut annikitsuinnaasinnaapput. Sivitsoriartornerani allannguutit avatangiisinut ersarinnerujartulissapput.

Qaratsap immikkoortuini qaap tulliullu nalaaniittuni puigortunngornerup immikkoortui

Qaratsap immikkoortuini qaap tulliullu nalaaniittuni puigortunngornerup immikkoortuisa ilaanni kinaassuseq pissusilersornerlu aallaqqaataaniit sunnerneqartanngillat. Tamatumunnga tarsiullugu oqalunniarnikkut ajornartorsiuteqalersoqartarpoq. Taamaalineq taaneqartarpoq oqalunnerup akornuteqaleriartuaarnera.

Qaratsap immikkoortuini qaap tulliullu nalaaniittuni puigortunngornerup immikkoortuani allami, oqaatsit isumaat suullu pissusaat puigoriartorneqartarput.

Nappaatip nalinginnaasumik qanoq ingerlasarnera

Qaratsap immikkoortuini qaap tulliullu nalaaniittuni puigortunngorneq, puigortunngornermik nappaatinit allanit ass. puigortunngornermit Alzheimerimit aallartiaarnerugajuppoq. Nappaatip suussusersineqarnerani nappaateqartut 55-it 65-illu akornanni ukioqarput inuusunnerullutilluunniit. Nappaat inummiit inummut assigiinngiiaaqaaq.

Akulikissusaa

Qaratsap immikkoortuini qaap tulliullu nalaaniittuni puigortunngortut Danmarkimi puigornermik nappaateqalersut 2-3%-eraat, tamarmilli pissusilersornikkut allannguuteqartanngillat. Puigornermik nappaateqalersuni 65-it inorlugit ukiulinni, qaratsap immikkoortuini qaap tulliullu nalaaniittuni puigortunngornermik nappaateqalersut amerlangatsiarput.

Patsisaasoq

Qaratsap immikkoortuini qaap tulliullu nalaaniittuni puigortunngorneq pissusilersornikkut allannguutitaqartoq, qaratsami nappaatinut assigiinngitsunut arlalinnut, ilaatigut qaratsap immikkoortui qaap nalaaniittut nungujartornerannut qaratsallu sananeqaataasa cellit suanngarnerannut atassuteqarpoq. Amerlasuuni qaratsami proteinit assigiinngitsut annertusisimasarputtaaq.

Nappaammik kingornussisarneq

Qaratsap immikkoortuini qaap tulliullu nalaaniittuni puigortunngortut pissusilersuutimikkullu allannguuteqartut 40%-iisa missaat kingornuttagaasorineqarput. Ilaqutariinnili arlallit taama nappaateqarpata, tamatuma annertunerusumik misissuiffiginissaa aatsaat tunngavissaqassaaq. Ilaqutariinni ataasiakkaani kingornuttakkamik qaratsap immikkoortuini qaap tulliullu nalaaniittuni puigortunngornermik nappaateqartuni, pinngoqqaatit nappaateqalersitsisut ilisimaneqarput.

Nakorsaaneq

Qaratsap immikkoortuini qaap tulliullu nalaaniittuni puigortunngornermik pissusilersuutikkut allannguutitalimmik ajorunnaarsitsisinnaasumik, imal. unikaallatsitsisinnaasumik nakorsaateqanngilaq. Taamaammat inuttaata nammineq qanigisaasullu, siusissukkut eqqortumik siunnersorneqarnissaat tapersersorneqarnissaallu pingaaruteqarpoq. Pissusilersornikkut allannguutit siullertut pingaarnertullu qaratsap immikkoortuini qaap tulliullu nalaaniittuni puigortunngortup avatangiisaasa naleqqussarnerisigut iliuuseqarfigineqassapput.