airplanebooksbriefcase business cogs cross election entertainment fish house law lockmedicalpeopleselfservices socialtax

Nappaat qanoq ilillugu suussusersineqartarpa?

Puigortunngornermut misissortinnerit assigiinngitsut arlaqarput. Misissuinerit inuttaannut naleqqussagaasarput; nammineq angerlarsimaffimmi najugaqarneq, paaqqutarinniffimmiinneq imal. napparsimmavimmi uninnganeq apeqqutaasarluni.

Misissuisarneq sumiiffimmiit sumiiffimmut allanngorarpoq, nakorsiarli Nuummi Dronning Ingridip Napparsimmavissuani sianiuteqarfitsigut nappaatinut immikkut ilisimasalimmut innersuunneqarajuppoq. Misissortinnissaq utaqqisariaqassaaq. 

Nakorsap apeqqutaasa akinissaannut– pingaartumik nammineq eqqaamalluarsinnaanngikkaanni- qanigisamik ikinngummilluunniit ikiuussinnaasumik ilaqarnissaq, tamatigut isumassarsiatsialaavoq.

Misissuinermi alloriarnerit siulliit

Puigutuneq puigortunngornermut ersiutit siullersarisinnaavaat – allarpassuarnilli aamma ersiuteqarpoq. Ersiuteqariartulerneq nammineq malugineqarajuppoq. Allatigut allanngornermik, ass. eqqaamasinnaanngin-nerulernermik qanigisaasut malussaqqaartuusarput.

Misissugaritinneq amerlanerni nakorsiarnermik aallarniuteqartarpoq. Nakorsap nappaammut ersiutit- qanorlu ineriartorsimanerat- sukumiisumik apersuutigissavai. Nakorsaq puigortunngornermik pasitsaassippat, nakorsiaqqinnissamut piffissamik isumaqatigiissuteqartoqassaaq, tassani nakorsaq peqqissutsimik sivikitsumik misissuissaaq, aaversittoqassaaq nalinginnaasumillu eqqaamasinnaaneq eqqarsartaatsimullu tunngasut allat misilinneqassallutik.

Misissuinerup nanginnera

Misissuinerit siulliit ingerlaneranni nakorsap puigortunngornermik pasitsaassinera annertusippat, amerlanertigut puigortunngortunut immikkoortortamut innersuussisoqassaaq. Paasisaqartoqanngippat nakorsarlu nalornippat, innersuussisoqarsinnaavortaaq. Puigortunngortunut immikkoortortami arlalinnik misissuisoqarsinnaavoq. Misissortinnissanut ataasiakkaanut utaqqisoqartariaqarajuppoq.

Nuummi qiteraliup ernganik misissuineq

Nuummi Dronning Ingridip Napparsimmavissuani qiteraliup ernganik misissuisoqarsinnaavoq. Qiteraliup ernga sananeqaatinik cellinik, proteininik imal. qaratsakkut sianiuteqarfitsigulluunniit nappaateqarnermut ersiutinik allanik akoqarsinnaavoq. Nakorsaq, qimerluit akornisigut kapisinikkut, qiteraliup ernganik misissugassamik tigusisinnaavoq.

Qaratsap scannerlugu misissorneqarnera

Amerlanerit qarasaat CT- scannerneqartarpoq. Qaratsap sukumiinerusumik misissornissaa nakorsap kissaatigippagu MR-scannertittoqassaaq. MR scannertinneq sivisunerulaarpoq uninngaqqissaarnissamillu piumasaqaatitaqarluni. MR-scannertinneq saviup kajungerisaanik sakkortuumik pilersitsisarmat, timimi savimineqarnerata, ass. siffiaasaqarnerup imal. saarngit qinneqarnerisa ilisimatitsissutiginissaa pingaaruteqarpoq. Puigortunngornermik pasitsaassinermi aaversittoqarsinnaavoq.

Pinngoqqaatinut tunngatillugu siunnersuineq

Puigortunngornermik kingornuttakkamik nappaateqarnermik pasitsaassinermi, pinngoqqaatinut kingornuttakkanut tunngatillugu siunnersorneqarnissamut- immaqalu misissorneqarnissamut- innersuussisoqarsinnaavoq. Misissortereernermi oqaloqatigineqarnissamut qaaqqusisoqassaaq, tassani misissuinerit inerneri paasissutissiissutigineqassallutik. Matumanissaaq qanigisamik ikinngummilluunniit ilaqarnissaq isumassarsiatsialaavoq. Misissuineq, amerlasuutigut nappaatip suussusersineqarneranik kinguneqassaaq. Puigortunngornermik nappaateqartut, nappaatip qanoq inneranik nakorsarneqarsinnaappallu nakorsarneqarnissaanut periarfissanik siunnersorneqarnissamik neqeroorfigineqassapput. Allanik oqaloqatigiinnermi qaqissallugit pitsaasunik- soorlu makkunannga oqaluuserinnittoqarsinnaavortaaq: 

  • Nappaat kingunerisaalu pillugit sumi paasissutissanik annertunerusunik pissarsisinnaavunga? 
  • Siunissaq ungasinnerusoq eqqarsaatigalugu ikiorneqarnissaq tapersersorneqarnissarlu siunertaralugit kommunimi kina attavigissavara? 
  • Bilersinnaassaanga?
  • Aningaasanut tunngasut internetsikkullu allagarsiat kia isumagissavai?
  • Alzheimerimik nappaateqartut peqatigiiffiat, peqatigiiffiilluunniit allat taamaaqataat, qanoq ilillunga attavigissavakka?
Nakorsaq attaveqarfigiuk

Illit imaluunniit qanigisat puigortunngornermik eqqugaasoq pasitsaassaqaruit, Kalaallit Nunaanni Peqqinnissaqarfik attaveqarfigisinnaavat.

Attaveqarnissamut periarfissat nunami immikkoortumi najugaqarneq malillugu pisarpoq. Attaveqarfissat uani takukkit https://peqqik.gl/Kontakt?sc_lang=kl-GL

Attaveqarfissaq

Isumaginninnermut, Ilaqutariinnut, Suliffeqarnermut Nunamullu Namminermut Naalakkersuisoqarfik Imaneq 4 3900 Nuuk Telefon +299 34 50 00 E-mail ISN@nanoq.gl www.usi.gl
Qarasaasianni paasissutissat ilaat atoqqissinnaajumallugit quppernermi matumani cookie't atorneqartarput.Akueriuk annertunerusumilluunniit uani paasisaqarit.