Nappaatip suussusersineqarnerata kingorna ikiorneqarneq tapersersorneqarnerlu
Puigornermik nappaateqalerneq, Peqqinnissaqarfimmi, napparsimmavimmi kommunimilu najukkanni ilinniagalinnut assigiinngitsorpassuarnut attaveqarnermik nassataqartarpoq. Suliassat suut ilinniagallit ataasiakkaat nalinginnaasumik isumagisaraat, qanorlu suleqatigiittartut, matumani atuarsinnaavatit.
Indhold
Nakorsamit ikiorneqarneq
Nakorsamit ikiorneqarneq
Peqqissutsit qanorlu inissisimanerit nakorsap ilisimaarilluarajummagu, nakorsaq napparsimanerit tamaat pingaarnertut inissisimavoq. Illit ilaquttavillu eqqortumik ikiorneqarnersi, nakorsaatit allanngussanersut peqqissutsikkullu allanik ajornartorsiuteqalissagaluaruit ikiuussinnaanissaq pillugit qulaajaanermi, nakorsaq ikiuussinnaavoq. Nappaatip puigortunngornerup ineriartornera pillugu ukiumut ataasiarluni marloriarluniluunniit nakorsamik oqaluussaqartarnissaq iluassaaq. Tamatumani illit nammineq saaffiginnittassaatit najukkannilu Peqqinnissaqarfimmut attaveqarlutit. Pisariaqarpat qanigisannik ikiorteqarit.
Nunatsinni kommunit ilaanni puigortunngortunut ataqatigiissaarisoqarpoq. Kommunimi puigortunngortunut ataqatigiissaarisoq napparsimaninni ilinnut qanigisannullu attaveqaataagajussaaq. Ataqatigiissaarisup puigortunngorninni ulluinnarni pitsaasumik inuuneqarsinnaanissannut siunnersussavaatit najukkamilu tapersersorneqarsinnaanermut, sungiusarneqarsinnaanermut sammisassaqarsinnaanermullu neqeroorutinik ilisimatissinnaallutit.
Ass. angerlarsimaffimmi peqqissaasoqarnissamik, timikkut sungiusarneqarnissamik imal. eqqarsarsinnaassutsip ilisimasanillu atuisinnaassutsip siuarsarneqarnissaannik pisariaqartitsilissaguit, puigortunngortunut ataqatigiissaarisoq kommunip innersuussisarfianut, aamma innersuussisinnaavoq.
Akuersissaguit puigortunngortunut ataqatigiissaarisoq nakorsamut attaveqarsinnaavoq taamaalillunilu nappaatit pillugu paasissutissat pingaarutillit nakkutiginissaannut ikiorsinnaassallutit.
Qanigisannit ikiorneqarnissannut akuersissummik pisinnaavutit.
Puigortunngortunut ataqatigiissaarisoqarnersoq suullu neqeroorutigisinnaaneraat paasiniarlugu najukkanni kommuni illit nammineq saaffigissavat.
- Nakorsiassaguit imal. puigortunngortunut ataqatigiissaarisumik allanilluunniit ataatsimeeqateqassaguit qanigisannik ilaqarit.
- Tamanna sioqqullugu oqaloqatigiissutigerusutasi allattorsigik.
- Oqaloqatigiinnerup nalaani paasissutissat pingaarutillit allattorsigik.
- Pappiaqqat pingaarutillit allattukkallu naniuminarsillugit mappimut katersukkit.
- Nakorsamut, puigotunngortunut ataqatigiissaarisumut allanullu isumaqatigiissutivit allattornissaannut ullorsiutit atukkit.
- Ataatsimeereernerni suna oqaluuserisimanerlugu ullorsiutinni allattarit, taamaalillutit pisunut nalunaarsuiffimmik ullorsiuteqalissaatit.