Biilimik ingerlatsineq puigortunngornerlu
Indhold
Utoqqaat puigortunngornermik nappaateqanngitsut amerlanersaat biilimik ingerlatsinissamut sungiussilluarsimasuupput isumannaatsumillu ingerlatsisarlutik. Puigortunngornermilli nappaateqarnermi biilernermik ukiorpassuarni misilittagaqarneq naamagunnaassaaq, piffissanngorumaarporlu biilimik ingerlatsisinnaajunnaartariaqarnissaq.
Puigortunngornerup aqqutissarsisinnaaneq, ataatsimut isiginnissinnaaneq aqqusinermilu angallannermi maleruagassanik eqqaamasinnaajunnaarneq nassatarisarmagu, biilimik isumannaatsumik ingerlatsisinnaaneq annaaneqartarpoq. Eqqarsartaatsikkut piginnaasat kigaatsumik sanngiilliartorajupput nappateqaleqqaarnermilu tamanna takujuminaattarluni.
Nappaat puigortunngorneq annikitsumik atoraanni nalinginnaasumik biilip aquutaata, pedalit gearillu atornissaat ajornakusoortanngilaq. ilungersunartunili, ataatsikkut arlalinnik takunnissinnaasussaaffimmi, aalajangiigasuarfissanilu, ajutoortoqarsinnaavoq. Tamanna ass. angallattoqarnerpaaffiani, imal. aqqusinermi arlalinnik sanguffissalimmi pisinnaavoq.
Puigortunngornermut siusissukkut ersiutaasartut assigiinngitsutigut sunniuteqartarput. Mianersornissamut ersiutit tassaasinnaapput:
- Sungiusimasani tammarneq.
- Angallannermi allagarsiussanik arajutsineq.
- Tunuarsimasussaanermik eqquutsitsinnginneq.
- Sukkassutsimik angallannermi pissutsinut naapertuussaannginneq.
- Aqqusinermi eqqortumik inissinnissap ajornartorsiutiginera.
- Siunerisanut qanillivallaannginnissap puigornera.
- Biilertut allat eqqarsaatiginnginnerat.
- Igalaanut marsarlerutit imal. sanguniarnermi kalerriutit qaminngitsoortarnerat.
Aqqusinikkut angallannermi ajutoornissamut aarlerinaat puigortunngornerup sakkortussusaanut atassuteqarpoq. Naatsorsueqqissaarnermi kisitsisit naapertorlugit utoqqaat puiguttortut aqqusinermi angallannermi ajutoorsinnaanerat annikitsuinnaavoq.
Qaqugu biilimik ingerlatsisinnaajunnaarnissamut aalajangersimasunik maleruagassaqanngilaq. Eqqarsartaatsikkut piginnaasat-ass. puigortunngorneq pissutigalugu eqqarsartaatsikkut piginnaasat sanngiilliartornerannut ersiuteqaraanni, imal. biilimik ingerlatsisinnaanermut piginnaasat annikilliartornerannut ersiuteqarpat, tamanna nakorsamut oqaloqatigiissutigisariaqarpoq.
Nakorsap peqqissutsimut takussutissamik biilernermut misilitsinnissaq innersuussutigisinnaavaa imal. biilersinnaajunnaarsimanermik naliliippat, biilernissamut inerteqqummik tunniussisinnaalluni.
Biilimik ingerlatsinerup illersorneqarsinnaajunnaarnerata siusissukkut qulaajaaviginissaa pingaaruteqarpoq. Akunnattumiit sakkortuumik puigortunngortut biilimik ingerlatsiunnaartariaqarput.
Biilernermut allagartaq allagartartaarninniit 70-inik ukioqalernissannut atuutissaaq. 70-iliiguit nakorsiassaatit. Biilersinnaanissat nakorsamit naliliivigineqassaaq.
70-ileereerninni biilernermut allagartat piffissap sivikinnerusup qaangiunnerani nutartertariaqartalissaaq:
- 70-inik ukioqaruit, ukiut sisamat atuuttussamik allagartalerneqassaatit
- 71-inik ukioqaruit, ukiuni pingasuni atuuttussamik allagartalerneqassaatit
- 72-it 79-illu akornanni ukioqaruit ukiuni marlunni atuuttussamik allagartalerneqassaatit
- 80-ileereersimaguit ukiut tamaasa nutaamik allagartartaartariaqassaatit
Biilernermut allagartartaarnissat tamaasa, nakorsap peqqissutsinnik misissuineranut uppernarsaammik pissarsiniartassaatit. Kalaallit Nunaanni Politiit taama ilisimatitsipput. Kalaallit Nunaanni politiinut imal. najukkanni innuttaasunik sullissivimmut saaffiginninnikkut biilernermut allagartartaarsinnaavutit.