Puigortunngorneq Lewy body tassaavoq utoqqarni qaratsakkut nappaat, sumik patsiseqarnera nakorsanit ilisimaneqanngitsoq. Nappammut atsiussaq tassaavoq sianiuteqarfitsigut nappaatinik immikkut ilisimasalik tyskeq Friedrich H. Lewy, siulliulluni qaratsap sananeqaataani cellini allannguutinik kingorna Lewy bodies (Lewy-timitaanik) ilisimaneqarlersunik nassuiaasoq.
Puigortunngorneq Lewy body kigaatsumik ineriartuaartarpoq, malussarissutsip imal. eqqumanerup allannguuteqarneranik aallartikkajulluni. Sivikinnerusumik sivisunerusumilluunniit inuttaata eqqarsaatai allamiippasissinnaapput ersarissumik paasinnissinnaanni imal. puullaaqisinnaalluni, qanorli inneq ullormit ullormut, nal. akunneraniit nal. akunneranut nikerarsinnaavoq. Inuttaa perusoqanngippasissinnaavoq, soqutigisaqarani, qasoqqalluni imal. misigissuseqarani, sivisuumik ukisisarluni ullullu ingerlanerani nalinginnaasumiit sivisunerusumik sinittarluni.
Puigortunngornermik Lewy body -mik nappateqartut takorruuisinnaasarput. Takorruukkat uummaarissorujussuugajupput, annikitsorpassuartaqarlutik piviusorpalaarlutillu, ass. inuusinnaapput imal. uumasut nipaqaratik inimi tassaniittut. Takorruukkat siooranartuusariaqanngillat.
Puigortunngornermik Lewy body-mik nappaateqartut sisamaappata pingasut pitsorluttunngortarput kigaatsumillu pissuseqaleriartortarlutik. Timip aalatinneranut atatillugu akornutit sajuttunngornerup Parkinson-ip ersiutaanut eqqaanarput. nukiit annikitsut ass. inussaniittut kiinnamiittullu atorsinnaallugillu ataqatigiissarsinnaanerat aamma ajornerulersarpoq, oqalunneq nipikinnerulersarpoq kigaallillunilu, misigissutsinillu takutitsisinnaaneq annikillisarluni. Taama nappaateqartut ilaasa, oqimangiutinik uummaarissunik eqqissiveqaranilu timip aalatinneranit sinnarliorneq, misigisarpaat. Sinnarliorneq ersiutit allat suli takkutinngitsut ukiuni arlalinni ineriartorsinnaavoq akulikitsumillu atugalluni.
Puigortunngorneq Lewy body inuunermi kingusissukkut – nalinginnaasumik 70-ileereernermi aallartittarpoq, inuusunnerusullu nappammik tamatuminnga eqqugaanngisaannarput. Amerlanertigut eqqaamasinnaaneq, ataatsimut isiginnissinnaaneq, ajornartorsiutinut aaqqiissuteqarsinnaaneq eqqarsartaatsimullu tunngassuteqartut allat, kigaatsumik ajorsiartortarput. Inuit puigortunngornermik Lewy body-mik nappaateqartut eqqarsartaatsimikkut timiminnillu atuinermikkut arriillinerusarput. Timimik atuisinnaanerup akornuteqalernera piffissap ingerlanerani ajornerulersarpoq.
Puigortunngorneq Lewy body, Danmarkimi puigornermik nappaatit atugaanerpaat pingajussarinngikkunikku sisamassaraat. Puigortunngorneq Lewy body nakorsanit immikkut ilisimasalinnit allaat puigortunngornermit Alzheimerimit sajuttunngornermiillu Parkinsonimit immikkoortikkuminaassinnaammat, tamanna nappaatip qanoq atugaatigineranut nalornilersitseqataavoq.
Puigortunngornermut Lewy body-mut patsisaasoq ilisimaneqanngilaq. Nappaatilli ineriartornerani qaratsami qanoq pisoqarnera nassuiarneqarsinnaavoq. Proteinit ajoqusiisartut ammarlortunngorlutik katersuutilersarput takkulu taaneqartarput Lewy bodies. Nappaat kalerrisaarummik acetylkolin-imik, qaratsap sananeqaataasa cellit attaveqatigiinnerminni atortagaannik amigaateqarnermik nassataqarportaaq.
Puigortunngorneq Lewy body utoqqaassutsip saniatigut ilisimaneqartunik allanik aarlerinaateqanngilaq.
Puigortunngorneq Lewy body kingornuttagaanngilaq.
Puigortunngorneq Lewy body ajorunnaarsinneqarsinnaanngilaq, utaqqiisaagallartumilli nappaatip ersiutaanik nipaallisitsisinnaasunik nakorsarneqarsinnaavoq. Nakorsaatit qaratsami kalerrisaarutip acetylkolin-ip, qaratsami sananeqaatinit cellinit attaveqaatitut atorneqartartup nungujartornera unikaallatsittarpaat. Qaratsap nammineq kalerrisaarumminik acetylkolin-imik atueqqissinnaanera, nakorsaatit pitsaanerulersittarpaat. Nakorsaat puigortunngornermik Lewy body-mik nappaateqartunut tamanut sunniuteqartanngilaq, nakorsaatillu kisiisa atorlugit nakorsaasoqarsinnaanani. Sajuttunngornermut ersiutinut nakorsarneqarnissaq, napparsimasut ilaasa pisariaqartittarpaat.
Ulluinnarni siunnersuineq nalinginnaasutigullu tapersersuineq oqilisaassinerlu, nakorsaanermi pingaaruteqarnerpaapput. Psykosertunut (piviusunik piviunngitsunillu immikkoortitsisinnaanngitsunut) nakorsaatit puigortunngornermik Lewy body-mik nappaatillit amerlanersaasa sapigarimmatigik, takorruuisarnermut nakorsarniarnerat ajornakusoorsinnaavoq.