Sorusussuseerunneq puigortunngornerlu

Sorusussuseerunneq tassaavoq soqutigisaqaranilu misigissuseqannginneq. Inuk sorususseqqanngitsoq soqutigisaqanngitsutut sorusussuseqanngitsutullu pissuseqarpoq. Sorusussuseerunneq siunnerfeqannginnermut kajumissuseqannginnermullu attuumassuteqarpoq. Inuk taamaattoq sulerinissamut kajumissuseqaranilu, perusussuseqaranilu qamuuna piumassuseqanngilaq.

Avatangiisinit sunnertinneq, nalaatsornikkullu periarnissamut kaamitsinerit taakkuunerupput inuttaata iliuuseqarnissaanut aqutsisuusut. Sorusussuseeruttut nal. akunnerpassui issiasinnaasarput sulerinatik avaanngusunnatillu. Ilaanni nerinissartik imernissartillu puigorsinnaasarpaat.

Sorusussuseerunneq puigortunngornermiinnaanngitsoq - aammali qaratsakkut ajoqusernerup kingorna tarnikkullu nappaateqarnermi atuuppoq. Sorusussuseerunnermut ersiutaasartut tassaapput:

Kajumissuseqannginneq soqutigisaqannginnerlu
Sorusunnginneq
Ataatsimoornerni peqataasarunnaarneq
Misigissutsikkut sanngiillineq
Iliuuseqarnissamut takorluuisinnaanermullu piginnaanikillineq
Inuttut eqqiluisaarnissamik qanorlu pissusilersornermik soqutigisaarunneq
Pissusilersornermik ilisimaarinnerup annikinnera

Sorusussuseerunneq nikallunganermut assingusinnaavoq- ilaatigut misigisuseqannginneq allaassutigalugu. Sorusussuseeruttoq ‘imaqanngitsutut’ ‘soqutigisaqanngitsutullu’ misigisarpoq, nikallungasorli taaqqumallunilu ernumasarluni.

Soruussuseerunnermut patsisaasut

Sorusussuseerunneq puigortunngornermi nalinginnaasorujussuuvoq nappaatillu ineriartornerani immikkoortuni tamani atugaasinnaalluni. Puigortunngornermik Alzheimerimik nappaateqartuni qaratsap immikkoortuani qaap tulliullu nalaanniittumi puigortunngortuni sorusussuseerunneq pissusilersornikkut allannguutini nalinginnanerpaagunarpoq. Puigortunngornermik Alzheimerimik nappaateqartut 60 %-iisa missaat sorusussuseerunnermut ersiuteqarput.

Sorusussuseeruttut namminneq qaqutiguinnaq ajornartorsiutitut misigisarpat. Sorusussuseerunnerli qanigisaasuni unammilligassaagajuppoq akueriuminassinnaallunilu.

Sorusussuseerunneq, qaratsap immikkoortuini kajumissutsimik misigissutsinillu aqutsisuni nappaateqarnermik patsiseqarpoq. Taamaammat inuttaata nammineq allanngortissinnaanagulu aqussinnaanngilaa. Sulerinissamik isumassarsineq imal. pisariaqartitsisutut misigineq inunni sorusussuseeruttuni pilersanngilaq. “Imaqanngitsutut” misigisarput.

Nakorsaaneq

Sorusussuseerunnermut immikkut ittumik nakorsaateqanngilaq, puigortunngornermulli nakorsaatit sorusussuseerunnermut ilaatigut sunniuteqarsinnaasarput.

Sorusussuseeruttut avataaniit sunnernneqarsinnaasarmata, qiimmassaaniarsarineq/siuarsaaniarsarineq iluaqutaasinnaavoq. Inuttaa oqaloqatigiinnerni imal. ataatsimoornerni peqataatinniarneqarsinnaavoq, sunngiffimmi sammisassanik siornatigut nuannarisarsimasaanik neqeroorfigineqarsinnaavoq, pisuttuaqatigineqarsinnaavoq imal. erinarsoqatigineqarsinnaavoq qiteqatigineqarsinnaalluniluunniit.

Siunnerfeqarnerusumik siuarsaaneq tassaavoq inuunermi misilittakkat pillugit oqaloqatigiinneq, eqqaamasanik avitseqatigiinneq qangalu pisimasunik eqqartuineq. Taamaaliornikkut anguniarneqarpoq inuup inuunerata oqaluttuassartaata oqaluuserinissaa, imal. sammisaqartitsinikkut soorlu inuttaata inuusunneraniit inersimasunngorneraniillu nipilersuutinik tusarnaarnikkut imal. qitinnikkut, eqqaamasat itertinnissaat. Oqaloqatigiinnerit, sammisallu inuttaata soqutigisarisimasai misigisarsimasaalu pillugit ilisimasat tunngavigalugit, aaqqissunneqassapput.

Inuunermi misilittakkat pillugit oqaloqatigiinneq, eqqaamasanik avitseqatigiinneq qangalu pisimasunik eqqartuineq; ass. naasut nerisassalluunniit tikkinut tunngassuteqarsinnaavortaaq. Tuttup/aqissit/appat siatat kaageeqqalluunniit tikkisa amerlasuunit juullimi eqqaamasanik utersaartitsisarnerat eqqarsaatigiuk.

Pisattat assilluunniit inuttaata nammineq inuunerisimasaaneersut, filmiliaritittartut-, kunngikkormiut imal. nuimasut assingi eqqaamasanik uummarsaasinnaapput.