Makitaneq eqqissiveqannginnerlu
Indhold
Makitaneq, eqqissiveqannginneq killeqanngitsumillu pissusilersorneq puigortunngortuni takussaagajupput. Pissusilersornikkut allannguutit, nappaatip ineriartornera ilutigalugu takkuttartut, puigortunngortut amerlanersaannik eqquisarput. Makitasuujuneq, eqqissiveqannginneq killeqanngitsumillu pissusilersorneq iliuuseqarfigiuminaassinnaapput qanigisaasuniillu sulisuniillu ilungersunartutut misigineqartarlutik.
Indhold
Inuit puigortunngortut oqaatsitigut iliuutsimikkullu makitasuujusinnaapput. Oqaatsitigut makitasuujunermi inuttaa suanngassisarpoq, pisuutitsisarpoq allaallumi sioorasarisinnaasarluni. Iliuutsikkut makitasuujuneq tassaasinnaavoq inummik arlaagut nusutsineq, ajatsineq, annersitsineq, isimmitsineq.
Makitaneq puigortunngortup kamanneranik, ersineranik/siooraneranik imal. amigaatilittut susinnaanngitsutullu misigineranik patsiseqarsinnaavoq. Taama pissusilersornera iliuusissanik aqutsisinnaajunnaariartorneranik aamma patsiseqarsinnaavoq. Pingaartumik qaap tulliullu nalaanni qaratsap immikkoortuisigut puigortunngornermi, aalajangersimasumik iliuuseqarnissamik isumaqaleriasaarnerup aqunniarnissaa ajutoorajuppoq puigortunngornerilli assigiinngitsut allat, nappaatip ineriartorluni immikkoortuini kingusinnerusuni qaap nalaani qaratsamut siaruaassimappat allannguuteqartoqarsinnaavortaaq.
Makitaneq naatsorsuutigineqarsinnaasarpoq naatsorsuutiginngisamilli aamma takkussinnaasarluni. Makitaneq ilimagineqarsinnaasoq paaqqutarineqarnermut atatillugu pilerajuppoq- puigortunngortumut annertuallaanik piumasaqaateqarnermik, imal. qanigisaasut sulisulluunniit naqqissuivallaarnerannik patsiseqarsinnaalluni. Naatsorsuutiginngisamik makitaneq inunnut allanut- soorlu najugaqatinut nalaatsortumik tussinnaasarpoq, tamannalu piviusuusorisanik imal. paatsuukkanik patsiseqarajulluni.
Qaap nalaani qaratsap immikkoortuani puigortunngortut makitasuunngorajupput.
Puigortunngortut toqqissiveqarajunngillat, iliuuseqarusulersarput siunnerfeqaratillu angalalersarlutik. Iliuuseqarusulernermi inuttaa qanigisaasunik sulisunilluunniit malersuiinnalersarpoq, sumi tamaani peqataanialersarluni apeqqutinillu uteqattaarilersarluni. Iliuuseqarusunneq tassaasinnaavortaaq inuttaata ilisanik allamut nuussueqattaalersarnera imal. passusseqattaalersarnera. Puigortunngortut ilaat taamaaliornermikkut, paatsiveqanngitsumi paasineqarsinnaanngitsumilu, isumaqarsinnaasumik imal. naleqassutsimik pilersitseqqinniarsarisarput.
Killeqanngitsumik pissusilersorneq, narrujuumminartumik, mamianartumik, innarliinermik allatulluunniit inuit akornanni akuerineqarsinnaanngitsunik iliuuseqarnermik nassataqarajuppoq. Taakku tassaasinnaapput ingasattajaartumik nerineq imernerluunniit, pujortaannalerneq imal. kinguaassiuutitigut assuarnartumik pissusilersorneq. Qaap tulliullu nalaanni qaratsap immikkoortuigut puigortunngortuni tunguarnitsutorusunnerulerneq atugaagajuppoq. Killeqanngitsumik pissusilersorneq, nalinginnaasumik qaap nalaani qaratsap immikkoortuanut nappaatip puigortunngornerup siaruaasimaneranik patsiseqarpoq.
Eqqissisaatit utaqqiisaagallartumik killilimmillu sunniuteqarput navianaatilinnillu kingunerluuteqarsinnaallutik. Taamaakkaluaq annertuumik eqqissiveqannginnermi sivikitsumik nakorsaatinik atuinissaq pisariaqarsinnaavoq. Nakorsaq oqaluuguk.
Makitasuujunermut imal. eqqissiveqannginnermut patsisaasut qulaajaaviginissaat pingaaruteqarpoq. Taakku sunik patsiseqarnersut ilisimagaanni pitsaalineqarsinnaapput. Taakku inummiit inummut allanngorarput, tassaagajullutilli anniarneq, iluaalliorneq, imermik imerpallaarsimannginneq nerrikippallaarsimanerluunniit. Puigortunngortoq avaanngusunnersoq (sammisaqartinneqarpiannginnersoq) imal. annertuallaanik misigisaqarnersoq (sammisaqartinneqarpallarnersoq) eqqumaffigisariaqarportaaq.
Makitasuunngorneq eqqissiveerunnerluunniit, ullormut piffissami aalajangersimasumi imal. arlaannik aalajangersimasumik pisoqarnerani takkuttarnersut maluginiaruk. Inuttaa paasilluarsinnaanngisaminut imal. innarligaasutut/ajuallatsitaasutut misigigaangami qisuariartarpa? Inuttaa ataqqineqarpa naleqartinneqarlunilu? Inuttaa naammattumik angalanissamut periarfissaqarpa? Puigortunngortup aneeqatiginera inuttaanut eqqissisaataasinnaavoq. Inuttaanut isumalittut misigineqartumik sammisaqarnissamut periarfissaqarpa? Inuttaata siornatigut soqutigisarisimasaanik, sunngiffimmi sammisarsimasaanik imal. inuussutissarsiutigisimasaanik aallaaveqarluni sammisassanik pisariitsunik- peqataaffigissallugit nuannarisaanik- nassaarnissaq periarfissagajuppoq.
Inuttaa kommunimi puigortunngortunut siunnersortimut attaveqarpat, taanna qanoq inuttaata inneranik naliliinissamut sammisassanillu siunnersuinissamut ikiuussinnaassaaq. Tassanngaannaq makittannerup- annernermik imal. timikkut nappaammik patsiseqarsinnaaneranik pasitsaassinermi, nakorsamik oqaluussinissaq pingaaruteqarpoq.