Nappaat nikallunganeq tassaavoq nanertisimasutut taaqqumasutullu misigisimaneq. Inuit tamarmik 10%-iisa missaat, inuunerup ilaa nikallunganermik nappaateqalersarput, nikallunganermilli nappaateqartut ilaat paasineqaratillu nakorsarneqartanngillat. Nikallunganermik nappaateqarnermi ersiutit inummiit inummut assigiinngillat. Taaqqumasutut nanertisimasutullu misiginerup saniatigut makku ersiutaagajupput:
- Imminut assuarineq
- Ingasaallugu imminut pisuutinneq
- Sinnarliorneq
- Illigisaqannginneq
- Ataatsimoornerni peqataarusunnginneq
Ullaakkut ajornerusarneq unnukkiartorneranilu qiimanerulerneq nalinginnaasuupput. Nikallunganerli assigiinngitsorpassuarnik takussutissartarqarsinnaasarpoq, inuillu ilaanni nanertisimaneq taaqqumanerlu ersarinnerpaajusanngillat. Nalinginnaanngitsunilli ersiuteqarsinnaasarput- soorlu eqqissiveqannginneq, toqqissiveqannginneq, puffajaneq kamaqqajaanerlu. Taama ersiuteqarneq timikkut /eqqarsartaatsikkut puffajanermik toqqissiveqannginnermillu taaneqartarpoq.
Nunatsinni ukiuunerani - pingaartumik taarsisalernerani nikallungasarneq nalinginnaavoq. Ukiuunerani nikallunganermut ersiutaasartut tassaapput qasoqqaneq, sinimmik annertunerusumik pisariaqartitsineq annertuunik sukkulinnik- soorlu mamakujunnik kaaginillu nererusunneq. Tamatumani nanertisimaneq taaqqumanerlu ersarippallaanngillat.
Imigassamik annertuumik atuineq nikallunganermut nakorsarneqanngitsumut ersiutaasinnaavoq. Inuit ilaasa nanertisimasutut misigigunik nakorsiarnissaq nuannarinngilaat, misigissutsilli imigassamik eqqissisaatinillu nipaallisinniartarlugit. Imigassartorpallaarneq qaratsamik ajoqusiisarmat nikallunganermillu puigortunngornermillu nappaateqalernissap aarlerinaataannik annertusisitsisarmat, tamanna pissutsinik ajorsiartortitsinermut aallarniutaasinnaavoq.