Kalerrisaarummik imaluunniit sumiiffissiuutitut aaqqiissummik atugaqarnissamut akerliunngitsut (§41, imm. 2):
Innuttaasunut puigortunngortunut, tarnikkut piginnaanikilliartorneranik pissuteqartoq, sulisut isumassuinerminnut ilaatillugu inummut kalerrisaarummik imaluunniit sumiiffissiuutitut aaqqiissummik atuinissaq aalajangersinnaavaat. Tamatumunnga piumasaqaataavoq innuttaasoq atuinermut akerliussanngitsoq (Takuuk qupp. 30).
Kalerrisaarummik imaluunniit sumiiffissiuutitut aaqqiissummik atugaqarnissamut akerliusut (§41, imm. 3):
Innuttaasoq puigortunngortoq kalerrisaarummik imaluunniit sumiiffissiuutitut aaqqiissummik atugaqarnissamut toqqaannartumik akerliuppat, § 34 naapertorlugu kommunalbestyrelsip aalajangiiffigissavaa. Tamanna isumaqarpoq, pissaanermik atuinissap pisariaqarneranik nalileeqqaartoqassasoq (Takuuk qupp. 37).
Inuup nuunnissaanut akuersissuteqarneq imaluunniit akuersissuteqannginneq (§36, imm. 4):
Innuttaasup puigortunngortup nuunnissaa innuttaasup pisariaqartitai peqqissusaalu tamatigut eqqarsaatigalugit pisassaaq. Pisuni qanigisaq – aapparisaq imaluunniit inooqatigisaq – maannamut isumassuinermik suliassanik isumaginnittuusoq, tamatumunnga isumaginnissinnaajunnaarpat, inuup nuunnissaanut akuersissuteqanngitsumik pisinnaanera naliliinermi ilanngunneqassaaq. Taamaattoq qanigisamut mianerinninneq kisiat nuussinissamut tunngavilersuutigineqarsinnaanngilaq, kisianni ataatsimut naliliinermut pingaaruteqartutut ilaatinneqassalluni (qupp. 80).
Qanigisanik isumassuineq (§37, imm. 3):
Ilitsersuummi qanigisat inissisimanerat naammagittaalliuuteqarsinnaanerallu aamma eqqarsaatigineqarput. Assersuutigalugu qanigisat innuttaasumut sakkortuumik puigortunngortumut immikkut ittumik najugaqarfissamik neqeroorummut innersuussutip itigartitsissutigineqarnera naammagittaalliutigisinnaavaat. Tamanna pisuni puigortunngortup isumassorneqarnissaq pisariaqartoq pillugu itigartitsineranut, aamma qanigisap isumassuineq kisimi isumagineranut annertuumik artorsaatissinneqarluni misigineranut attuumassuteqarsinnaavoq (Takuuk qupp. 77).