Inunnik puigortunngortunik paaqqutarinninnermik sulisunut siunnersuutit arfineq-marluk
Indhold
Inuit puigortunngornermik eqqugaasut isumagissallugit ilungersunartuuvoq, kisianni suliassaavoq pingaaruteqartoq. Paaqqutarinnittutut ilissi puigortunngornermik eqqugaasunut toqqissisimanermik inuunermillu naleqarluartumik pilersitsinissamut qitiulluinnarpusi. Isumassuinissamut siunnersuutitsialaat arfineq-marluk tulliupput, piorsarsimassutsimik, pinngortitamik inuillu ataasiakkaanik eqqarsaatiginnittut.
Pugiortunngornerup inuk tamaat nassuiarsinnaanngilaa. Nappaat isiginagu inuk suli tassaniittoq naapiguk. Inuunerup oqaluttuassartaa, ileqqut misilittakkallu inuup kinaassusiata ilagivai. Taakkununnga isumallit – immaqa aalisarneq, kangerluk imaluunniit ukiuunerani unnuat takisuut pillugit oqaloqatigikkit.
Puigortunngornermik eqqugaasut ulluinnarni eqqissisimanermik aalajangersimasumillu killissalimmik pisariaqartitsipput. Aalajangersimasumik pisarneq aamma avatangiisit nalunngisat ilusilersuinermut atukkit. Assersuutigalugu ulluinnarni suliassanut sakkut assigiit periaatsillu ajornanngitsut atortakkit, taamaalillutik toqqissisimanerullutik paatsiveeroqqajaanatik misigisimaniassammata.
Puigortunngornermi paasisaqarnissaq imaluunniit paasineqarnissaq ajornakusoorsinnaavoq. Kigaatsumik oqalugit, oqaaseqatigiiaat naatsunnguit atukkit aamma timi atorlugu qanoq isumaqarnerlutit takutiguk. Tusarnaarluarneq pingaaruteqarluinnarpoq – najuunnerit takutiguk akissuteqarnissaallu piffissaqarfigalugu. Oqaatsit naammanngippata, iliuuseqarnikkut isumassuinerit takutiguk.
Suli iluatsittartut ersersikkit. Puigortunngornermik eqqugaasumut iluatsitsinerit mikisunnguilluunniit naleqassusermik nuannaarnermillu misigisitsisinnaapput. Sammisassanut isumalinnut peqataanissaannut ikiuigit – assersuutigalugu aalisakkanik saliineq, oqaluttuarneq imaluunniit pinngortitamiinneq.
Qanilaassuseq isumassuinerlu pingaaruteqarluinnarput. Qungujunneq, attorneqarneq imaluunniit nipeqarnani issiaqatigiinneq toqqissisimalernermik misigititsisinnaavoq. Paatsiveeruteqqajaappata imaluunniit nikallungappata tuppallersarniarlugit neqeroorfigikkit, aamma misigissusaat paasillugit takutiguk.
Kalaallit Nunaanni inunnut amerlasuunut pinngortitaq piorsarsimassutsikkullu ileqqut kinaassutsimut ilaalluinnarput. Qaqqat, imaq imaluunniit inuunerannik oqaluttuaat attaveqatigiinnermik pilersitsinissamut atukkit. Ilisimaarisat ilisaralugit eqqissisitsisinnaapput nuannaalersitsisinnaallutillu.
Isumassuinermik sulineq misigissutsitigut oqimaassinnaavoq. Eqqaamallugu unillatsiarnissat aamma unammilligassat pillugit suleqatitit oqaloqatiginissaat. Illit peqqinnerullutit misigisimaguit, puigortunngornermik eqqugaasut atorfissaqartitaannik isumassuinerusinnaavutit.
Inunnut puigortunngornermik eqqugaasunut ulluinnarni toqqissisimanerusumik isumaqarnerusumillu inuunissaannut paaqqinnittutut siunnersuutit atorsinnaavasi – nappaataat aamma piorsarsimassusiat ataqqillugit.