Puigortunngornermik nappaateqaleraluarluni sammisaqartoqarsinnaavoq, nuannarisanik sammisaqartuarnissaq inuunerup naleqassusaanut peqqissutullu misiginermut pingaaruteqarpoq.
Sammisat suut pisuunnguallatitsisartutut misiginerat assigiinngilaq. Inuit ilaannut inuunerup naleqassusaa, ulluinnarni qanigisaasut peqatigalugit pitsaasumik inuuneqarnermut tunngassuteqarpoq. Allani inuunerup naleqassusaa, nerisassanut pitsaasunut imigassanullu, timigissarnermut piorsarsimassutsikkullu aaqqissuussinernut, pinngortitami pisuttuarnermut, angalanernut il.il. attuumassuteqarpoq. Sammisat tassaasinnaapputtaaq iluarisamik, qiimanartumik pisussaaffiliinngitsumillu inunnik allanik peqateqarneq.
Sammisanik nutaarluinnarnik aallartitsitinnani ilisimariikkat attatiinnarnissaat naleqqussarnissallu isumassarsiatsialaagajuppoq. Sammisaqarluni inuunerup nanginnissaanut; ilaquttanit, nammineq piumassutsiminik sulisumit imal. puigortunngortunut ataqatigiissaarisumit tapersersorneqarnissaq pisariaqartinneqarsinnaavoq.
Puigortunngornermi sammisaqarneq
Sammisarsimasat ajornakusuulernerat imal. mersernarsinerat puigortunngornerup nassatarisinnaavaa. Immaqa nallukattarneq sungiusimasimavaa, maannali tamakkiisumik paasinissaa ajornartorsiutigilersimallugu. Aalisariartarsimasinnaavoq, maannali atisassat, atortussat nillujuitsullu eqqaamanissaannut ikiortariaqalersimalluni. Tamatumani qanigisaasutut imal. sulisutut, puigortunngortup nuannarisaminik immaqa sammisaqaannarsinnaanissaanut, ikiuullunilu tapersersuisoqarsinnaavoq.
Timimik atuineq timigissarnerlu, timikkut tarnikkullu iluarusulersitsisarput, illigisaqarnerulersitsisarput ullup unnuallu muminnerannut sinnarliornermullu iluqutaasarlutik. Aammali oqaluunnissaq paasinninnissarlu ilungersuutigisariaqarnagit inunnik allanik peqateqarneq, inoqatinut akuunissap nukittorsarnissaanut iluaqutaapput. Taamaammat periarfissaagallartillugu allanik peqateqarluni timimik atuiuarnissaq timigissartuarnissarlu isumassarsiatsialaavoq. Illoqarfimmi pisuttuarneq puigortunngortup timiminik aalatitsinissaanut silaannarissarnissaanullu periarfissiissaaq.
Puigortunngornermi- pingaartumik eqqaamasinnnaaneq isumaliutersorsinnaanerlu eqqorneqartarput, nipilersuutinilli, erinarsornermik qitinnermillu nuannarisaqarneq attatiinnarneqartarlutik. Allat puigorsimagaluarlugit erinnat taallallu eqqaamaneqarajupput. Taamaapportaaq nipilersuummik nipilersorsinnaasimagaanni imal. qiteriatsimik ilikkagaqarsimagaanni. Radiomi aalajangersimasumik naalagaqartarneq imal. nipilersuummik nuannarisamik naalaarneq pingaaruteqarsinnaapputtaaq. Immaqa ilisarisinnaasaa- eqqaamasaanillu eqeersitsisinnaasoq puigortunngortumut pitsaasuuvoq.
Isumassarsiorsinnaaneq eqqumiitsuliornerlu puigortunngortunut immikkut pingaaruteqarsinnaapput. Piffissammi ingerlanerani pisarnertut oqariartuuteqarsinnaaneq ajornakusoornerulersinnaavoq. Takorluuisinnaanerli, periataarsinnaaneq, misigissutsit isumassarsiorsinnaanerlu ajunngitsumik atuussinnaapput, attaveqatigiinnermullu, imminut naleqartinnerup pitsaanerulerneranut ataatsimoortutullu misiginermut, nutaanik periarfissiissallutik.
Pinngortitaq inunnut puigortunngortunut timimik atuinissamut misigisaqarnissamullu periarfissarpassuarnik tunisisarpoq. Sissiukkap eqqaani, illoqarfimmi immaqalu qaqqami angalaarneq orlujaassutsimik qasujaassutsimillu pitsaanerulersitsisinnaavoq, sukkasuumillu pisunneqarmi tillerit akulikillisinneqarsinnaallutik. Tamatuma peqatigisaanik pinngortitaq piumasaqaatitaqanngitsumik malugisaatinik eqeersaasarpoq. Taamaammat inunni puigortunngortuni pinngortitami angalaarneq eqqissinarlunilu qasukkarnarsinnaavoq.