Inuttut inooqataanitsinni attaveqatigiinneq annertuvoq, avatangiisitsinnillu attaveqarsinnaaneq peqqissutut misiginitsinnut annertuumik pingaaruteqarluni. Attaveqatigiinnitsinni oqaatsit eqqaamasinnaanerlu sakkussat pingaaruteqarnerpaat ilagaat. Puigortunngornermik nappaatit amerlanersaanni oqaatsit eqqaamasinnaanerlu annikinnerusumik annertunerusumilluunniit sunnerneqartarmata, ajornartorsiutitaqanngitsumik attaveqarsinnaaneq annikillisarpoq.
Attaveqatigiinneq puigortunngornerlu
Puigortunngorneq attaveqatigiinnermut ima unammilliisarpoq
Puigortunngornerup ajornakusuulersittarpaa:
- oqaatsit atorlugit oqaatiginnissinnaaneq – pingaartumik taggisinik eqqaamasinnaaneq.
- Ilaquttat ikinngutillu aqqinik eqqaamasinnaaneq.
- oqaloqatigisap oqaasiinik paasinnissinnaaneq.
- oqaloqatigiissutigisamik eqqaamasinnaaneq
- oqaloqatiginninniarsinnaaneq.
Oqaatsinik atuinerup eqqaamasinnaassutillu allannguuteqarnerat, inoqatinik ataatsimooqateqarsinnaanermut unammilligassiisinnaavoq. Puigortunngorsimagaanni arlaatigut kukkusinnaaneq kukkusumilluunniit oqarsinnaaneq annilaangagineqarsinnaammat, ataatsimooqateqarnissaq imal. ataatsimuualaarnerni peqataanissaq merserineqarsinnaavoq.
Qujanartumilli oqaatsitigut piginnaasanut qanittumilu pisut eqqaamanissaannut ikorfartuutaasunik pitsaasunik periusissaqarpoq teknikkullu atortorissaaruteqarluni.
Attaveqatigiinnermut ikorfartuutissatut siunnersuutit pitsaasut
- qanoq ikiorneqarusunnerit pillug ilaquttatit oqaluutikkit. Oqaatsit nassarinissannut ikiorneqarusuppit imal. nammineq misileeqqaarusuppit?
- Puigortunngornermik nappaateqarnerit, taamaammallu eqqaamasinnaanikkut oqaatsitigullu unammilligassaqarnerit ammaffigiuk.
- oqaloqatigisavit paasiuminartumik kigaatsumillu oqalunnissaanik kissaateqarit.
- oqaatiginiakkannut ikorfartuutitut assit ilisarnaatilluunniit atukkit.
- oqaatiginiakkannut eqqaamassutissatut oqaatsit ataasiakkaat eqqaamaniutissat allakkit.
- isumaqatigiissutit allassinnaanngorlugit allaffissaq ullorsiutilluunniit oqarasuaatip eqqaaniitikkit.
- ullorsiutit ilaquttannit pulaartunilluunniit allaffigineqarsinnaanngorlugit tamanit takuneqarsinnaasumut inissikkit.
Kommunili puigortunngortunut ataqatigiissaarisoq, iluaqusersuutit allanik attaveqarniarninni iluaqutaasinnaasut pillugit oqaluttuussisinnaasoq, sukkulluunniit attavigisinnaavat.
Ilaquttatit ima ikiuussinnaapput
Aappat, ilaquttatit ikinngutitillu, isumaqatigiissutigisassi suullu oqaloqatigiissutiginerisa eqqaamanissaannut ilinnik oqilisaasinnaapput.
Ilaquttavit ikinngutivillu tapersersorsinnaavaatsit:
- soqutiginninnikkut naalaarnikkullu.
- naammagittarlutik nassuiaanissannut piffisaliinikkut.
- eqqissisimasumik, kigaatsumik, ersarissumik oqaaseqatigiillu naatsut atorlugit oqalunnikkut.
- oqaatiginiakkanni oqaatsit naniniarneranni ikiorteqarnissamik kissaateqarninnik eqqumaffiginninnikkut.
- ilisimatitsissutinik pingaartunik allaffigisarnikkut.
- ilisimatitsissutinik apeqqutinillu uteqqiisarnikkut.
- ass. radio-ip imal. TV-ip qaminnerisigut avatangiisini nipiliornernik annikillisaanikkut.