Puigortunngornermik nappaateqalernerup nassatarisaanik unammilligassanut ikorfartuutaasussanik taartaasussanillu piukkunnartunik teknologi atorlugu iluaqusersuuterpassuaqarpoq. Iluaqusersuutit ulluinnarni nammineersinnaanerulersitsillutillu toqqissisimanerulersitsisinnaapput. Inunnut puigortunngortunut iluaqusersuutit ilaat uani atuarsinnaavatit. Nunatsinni iluaqusersuutinut Nuummi qitiusumik peqqumaasiveqarpoq sinerissamilu kommunit allat assigiinngitsunik peqarsinnaallutik. Taamaammat nammineq kommuninnut saffiginnissaatit iluaqusersuutinillu pissarsisinnaanissamut periarfissaqarnerit apeqqutigalugu.
Iluaqusersuutit puigortunngornerlu
Iluaqusersuutit eqqaamasinnaassutsimut piffissamillu nakkutilliisinnaanermut ikorfartuutit
Oqarasuaammi qarasaasiamiluunniit angallattakkami (iPad) internetsi atorlugu ullorsiut; qaammatip, sap. akunnerata ullulluunniit ataasiakkaat akornanni toqqaanissannut periarfissiisinnaavoq. Internetsimi ullorsiummi kalerrisaarutinik, isumaqatigiissutinik imal. eqqaamasassanik eqqaasitsisinnaasunik aamma inissiisinnaavutit. Ullut tamaasa imal. sap. ak. ataasiarlutit pisassannik eqqaasitsisussanngorlugu aamma inississinnaavat.
Oqarasuaammik atuinermi sumiissusersiniaanermilu iluaqusersuutit
Oqarasuaat
Nerrivimmiittussianik atoruminartunik, normunut toqqakkanut aalajangersimasunut, asseq toorlugu attaveqaataasinnaasunik, oqarasuaateqarpoq. Oqarasuaatinik angallattakkanik angisuunik kisitsisitalinnik imal. ataasiaannarlugu toorlugu normunut aalajangersimasunut attaveqarfiusinnaasunik, aamma peqarpoq.
Matuersaatinut ujarliut
Matuersaatinut ujarliut tassaavoq kalerrisaaruteeraq avataaniit aquttagaq, ass. matuersaatinut, aningaasivimmut taskimulluunniit ikkunneqarsinnaasoq. Kalerrisaarut aallartinneqaruni nipiliulissaaq taamaalillunilu tammaasaq sumiiffissineqarluni. Oqarasuaammi angallattakkami summiisusersisoqarsinnaavortaaq.
Sumiissusersiutit
Oqarasuaatit angallattakkat inuttaa sumiiffissisinnaanngorlugu sumiissusersiuteqarsinnaapput (GPS). App-it assigiinngitsut puigortunngornermik nappaateqartup oqarasuaataa qanigisaasunut attavilersinnaavaa.
Isumannaallisaanermut toqqissisimanissamullu iluaqusersuutit
Malussarniutit
Erngup kuuffiinik malussarniutitalinnik, isumaminnik kuulersarlutillu kuugunnaartartunik, ikkussisoqarsinnaavoq. Malussarniuttaaq iluaqutsiullugu qulleq ikinneqarlunilu qaminneqarsinnaavoq.
Kissarsuummut nakkutilliissut
Kissarsuummut nakkutilliissutit piffissap aalajangersimasup qaangiunnerani kissarsuut qamittussanngorlugu aaqqinneqarsinnaapput. Kissarsuutip immikkoortuisa ilaat ikumasoq malugisinnaavaa qamillugulu.
Ikuallattoqalerneranut/putsertoqalerneranut kalerrisaarut pujortartunullu saaliaqut
Puigortunngornermik nappaateqartoq pujortartarpat, cigaretsit ikumasut inigisami arlaanni siniffimmiluunniit puigorneqarsimasinnaanerat eqqumaffigisariaqarpoq. Kalerrisaarutinik ikkussinikkut pujotartartunullu saaliaqummik qinnuteqarnikkut ikuallattoqarsinnaanera pitsaalineqarsinnaavoq.
Qanoq ililluni iluaqusersuutinik qinnuteqartoqarsinnaava?
Iluaqusersuutit arlallit pisiniarfinni internetsikkulluunniit pisiassaapput, allalu kommunimut qinnuteqaatigineqarsinnaallutik. Kommuni, immikkut naliliineq tunngavigalugu iluaqusersuummik tunineqarsinnaanissannik aalajangiisaaq. Kommunip innersuussisarfia iluaqusersuutinik qinnuteqarfiussaaq.