Puigortunngornerit nappaatitut suussusersineqarpat, sapinngisamik siusinnerpaamik siunissaq pillugu apeqqutit assigiinngitsut isummerfigisimanissaat ilinnut iluaqutaassaaq. Taamaaliornikkut ilinnut aningaasaqarnermullu tunngasunik kia ikiussaneraatit nammineq sunniuteqarfigisinnaassavat. Eqqarsaativit, misigissutsivit pisariaqartitavit kissaatigisavillu ilisimanerat, ilaquttavit ikiuunnissaannut oqilisaataassaaq.
Siusissukkut isummereernikkut siunissaq toqqissinarnerulersissinnaassavat pifissanngorpallu kissaatigisattut pisariaqartitannik tapersersorneqarnissat ikiorneqarnissallu tatiginerulerlugu.
Siunissap isummerfiginera
Puigortunngorneq aalajangiisinnaanerlu
Tunngaviusumik inatsit naapertorlugu, namminermut, pigisanut- nalilinnullu allanut tunngasunik aalajangiisinnaaneq pisinnaatitaaffiuvoq. Aalajangiisinnaanermi iliuuseqarsinnaaneq piumasaqaataavoq. Imaappoq namminermut tunngasunik isumatuumik pisarialimmillu naliliisinnaassuseqarluni isumaginnissinnaaneq innarlersimassanngilaq.
Puigortunngornerup iliuuseqarsinnaassuseq sunnertarpaa
Puigortunngornermik nappaateqarnerup iliuuseqarsinnaassuseq, ukkassisinnaassuseq, naliliisinnaassuseq, ajornartorsiutinik aaqqiisinnaaneq il.il. sunnersinnaasarpai, nappaatip atuleqqaarnerani suli iliuuseqarsinnaassuseqaraluarlutit namminerlu aalajangersinaallutit, inuttut namminermut aningaasanullu tunngasunut tapersersorneqarnissaq pisariaqartissinnaavat. Kingorna inuttut namminermut aningaasaqarnermullu tunngasut allanit isumagineqarnissaat pisariaqartilersinnaavat.
Tamana inuup allap illit sinnerlutit aalajangiinissaanik soqutigisannillu isumaginninnissaanik kinguneqassaaq.
Aningaasaqarnermut inuttullu namminermut tunngasut isumagisinnaanissaannut tapersersoneqarlutillu ikiorneqarit
Arlalitsigut tapersersuisoqarsinnaavoq. Nakkutiginnittoqarnissaq, siunissamut pisinnaatitsissusiornissaq imal. assigiinngitsunik pisinnaatitsissusiornissaq toqqarsinnaavat. Ilaquttavit arlaannik imal. ilisarisimanngisamik nunatsinni eqqartuussisoqarfimmit toqqakkamik nakkutilliisulerneqarsinnaavutit. Siunissami paaqqutarineqarnissamut-, nakorsarneqarnissamut aamma/imal. nammineq aalajangersinnaajunnaarnermi nakorsartinnissamut/ nakorsartinnginnissamut uppernarsaammik kissaateqarsinnaavutittaaq. Puigortunngorneq kingusinnerusukkut ajornerulerppat piareereersimaqqullugu, nappaateqarnermi siusissukkut taanna isumannaarneqarsinnaassaaq.
Siunissamut isummernissannut siunnersuutit pitsaasut
- Puigortunngornermik nappaateqarnerit aamma eqqarsaatigalugu, maanna siunissamilu ilinnut suut pingaaruteqarnersut isumaliutigiuk.
- Siunissaq pillugu eqqarsaatitit misigissutitsillu ammaffigikkit, ilaquttatit piffissaagallartillugu oqaluutikkit.
- Puigortunngortunut ataqatigiissaarisumik, inatsisilerituumik imal. inunnik isumaginninnermi siunnersortimik ikiortissannik siunnersortissannillu pissarsiorit.
Ilaquttatit peqatigalugit apeqqutit makku oqaluuserinissaat iluaqutaasinnaavortaaq:
- Aningaasatigut kia ikiussavaanga?
- Aappparma ilaquttamalu sutigut ikiuunnissaat kissaatigaara?
- Qanoq ikiorneqarusuppunga?
- Siunissaq pillugu aappara ilaquttakkalu qanoq eqqarsaateqarpat?
- Siunissamut piginnaatitsissut – sunaana, atorfissaqartissavarpullu?
Paasissutissanik annertunerusunik pissarsiniarnermi, illit nammineq qanigisatilluunniit kommunimut saaffiginnissinnaavusi. Kommunimi najukkanni puigortunngortunut ataqatigiissaarisoqarpat toqqaannartumik attavigineqarsinnassaaq.