Tapersersuinissamut ikiuunnissamullu tunngatillugu pingaarutilimmik inissisimanerit, puigortunngortumut qanigisaasutut misigissavat. Immaqa angerlarsimaffimmi suliassat annertunerit isumagisalissavatit. Naammagittassutsikkut misilitsinnerusinnaavoq, immaqalu oqaloqatigiinnissinni paatsooqatigiittarsinnaallusi.
Puigortunngornerup ineriartornera ilutigalugu, ikiorneqarnissarsi pisariaqalissaaq. Taakku tassaasinnaapput angerlarsimaffimmi ikiorteqarneq imal. sammisassatut neqeroorutit, aammali tassaasinnaalluni illit puigortunngortumut qanigisaasutut pitsaanerusumik attaveqarsinnaanissannut ikiorneqarneq. Illit kommunerisanni puigortunngorneq pillugu immikkut ilisimasalinnik- ass. puigortunngortunut ataqatigiissaarisunik siunnersuisinnaasunik ilitsersuisinnaasunillu- sulisoqarpoq.
Qanigisaaneq
Qanigisaasup puigortunngorluni allanngornerani misigissutsit unammilligassallu oqimaassinnaapput. Piareersimaffiginngisat qanigisaasutut misigineqarsinnaapput, tamatumalu peqatigisaanik nappaat siunissamut ernumalersitsisinnaalluni.
Uani qanigisaasutut inuuninni iluaqutigisinnaasannik paasissutissinneqassaatit.
Puigortunngortoq ulluinnaallu
Pingaarnersiornissaa ajornakusoorsinnaagaluaq, imminut paarinissaq pingaaruteqarpoq. Pingaartumik puigortunngortumut qanigisaasutut tapersersuinissannut, illillu nammineq ulluinnaat ajunngitsumik ingerlasinnaaqqullugu, nukissaqartuarsinnaanissannut, ulluinnarni nuannaalersitsillunilu nukissanik tunisisussamik qasuersaarfeqarnissat, pingaaruteqarpoq.
Kommunit- imal. kommunimi puigortunngortunut ataqatigiissaarisoqarpat attavigiuk ilinnullu aaqqiissutaasinnaasoq pitsaasoq suunersoq paasiniarlugu. Qanigisaasut amerlasuut, pissutsit qanoq innerat pillugu ikinngutinut ilaquttanullu ammasuunerup iluaqutaanera misilittagaqarfigaat. Tamatuma kingunerisaanik, puigortunngortup suna pillugu allanngornera paasilluarsinnaanerulersarpaat. Taakku aamma illit paasilluarsinnaanerulissavaatsit pisariaqartitannillu tapersersorsinnaassallutit.
Aappariinnissinni ilaqutariinnilu inissisimaffissi ataqatigiinnissiluunniit allanngornerat misigissavat. Puigortunngortumut - soorlu aningaasaqarnermut inuttullu namminermut tunngasunik isumaginnissinnaanermik ajornartorsiuteqarneq annertusiartuinnassaaq. Taamaammat siusissukkut, illit qanigisat puigortunngortoq isummersinnaatillugu, namminerlu siunissamut kissaatiminik oqaatiginnissinnaatillugu, suut pingaaruteqarsinnaanerannik paasiniaanissat isumassarsiatsialaassaaq.
18-ileereersimasut tamarmik silaminnik silallit, piginnaatitsissummik atsiorsinnaapput. Tamanna inuit namminneq soqutigisaminnik isumaginnissinnaajunnaarlutik puigortunngorsimasut, ilisimanngitsut tarnikkulluunnit allaassuteqartut, piginnaatitsissusiorsinnaannginnerannik isumaqarpoq. Taamaattoqartillugu sinniisoqarneq pisariaqassaaq. Sinniisoqarneq, puigortunngortumut- nappaanni pissutigalugu nammineq aalajangiisinnaanngitsumut- inummik allamik aningaasanut aamma/imal. inummut namminermut tunngasunut isumaginnittussamik toqqaanikkut, aaqqissuussineruvoq. Sinniissussamik nammineq noqqaasoqarsinnaavoq, sinniisussarsinissamullu kommunimit ikiorsiisoqarsinnaalluni. Piumasaqaataasut tassaapput; sinniisoqarnissap pisariaqartinneqarnera, puigortunngortullu tarnimigut nappaateqarnera, tarnikkut ineriartornerata kinguarsimanera imal. peqqissutsikkut allatigut annertuumik sanngiifeqarnera.