Puigortunngornermik eqqugaasumut qanigisanut siunnersuutitsialaat arfineq-marluk
Indhold
Puigortunngornermik eqqugaasumut qanigisaalluni suliassaavoq pingaaruteqartoq isumassuinerusorlu, kisianni aamma ilungersunarsinnaasoq. Puigortunngornermik nappaateqalertumut kisimi sunniuteqarneq ajorpoq, qanigisanulli aamma sunniuteqartarluni. Puigortunngornermik eqqugaasoq pillugu qanigisatut misigiumaarpat, inuup assut allanngornera. Iliuuseqarfiginissaa ajornakusoorsinnaavoq, pingaaruteqarporli qanigisatut puigortunngornermik eqqugaasumut isumassuiuarnissaq. Puigortunngornermik eqqugaasup inuup pissusiminik allanngornini nammineq iliuuseqarfigisinnaanngilaa aamma qanigisat tunuarterlutik isumassuivallaarunnaarpata, eqqugaasumut ajortumik sunniuteqassaaq. Taamaattumik puigortunngornermik eqqugaasoq tapersersussallugu aamma nammineq qanigisatut imminut paarinissaq pingaaruteqarpoq. Aqqutinni siunnersuutitsialaat arfineq-marluk tulliupput.
Puigortunngorneq nappaataavoq, kinaassutsimut tunnganani. Pingaartuuvoq eqqaamassallugu, puigortunngornermik eqqugaasoq suli inuummat eqqarsaateqartoq, misigissuseqartoq aamma kissaateqartoq. Kinaanera aamma suli pisinnaanera pillugu ataqqinnittumik paasinnittumillu naapinniarsariuk.
Ataatsimoorneq kikkunnut tamanut pingaaruteqarpoq – aamma puigortunngornermik eqqugaasunut. Inuuneq pitsaanerulersinnaavoq immaqalu nappaatip ajorsiartornera kigaallatsillugu. Taamaattumik eqqumaffigiuk attaveqarnerpit attatiinnarnissaa aamma allat ilittut iliornissaannik kaammattorlugit. Sammisassat ajornanngitsut, soorlu kaffisoqatigiinneq imaluunniit pisuttuaqatigiinneq, allannguutaasinnaavoq.
Puigortunngornermi qanga pisut eqqaamanissaat siunissarlu pillugu eqqarsarnissaq ajornakusoorsinnaavoq. Taamaattumik pingaaruteqarpoq nalitsinniinnissaq. Qungujunneq, pakkussineq imaluunniit maannakkorpiaq pisut pillugit oqaloqatigiinneq puigortunngornermik eqqugaasumut toqqissisimalersitsisinnaapput nuannaalersitsillutillu.
Puigortunngorneq tassaavoq nappaat ersinngitsoq, aamma avatangiisiniit paatsuuinernut imaluunniit eqqartuerusunnginnermut kinguneqarsinnaasoq. Nappaat pillugu ammasumik oqaloqatigiissutiginera iluaqutaasarpoq, taamaalillutik allat qanoq kinguneqarnersoq paasisinnaalissavaat. Oqallisigeqqusaannginnera kipisinnaavat aamma allaniit tapersersorneqarnissat periarfissaalersinnaavoq.
Pingaaruteqarpoq illit qanigisatut aamma imminut paarinissat. Sammisassanut piffissaqarnissat isumagiuk, taamaalillutik nukissaqaqqilerlutit nuannaalerlutillu. Imaassinnaavoq ikinngutit naapillugit, timigissarlutit imaluunniit unillatsiaannarlutit. Peqqissuuguit, puigortunngornermik eqqugaasoq tapersersorluarnerusinnaavat.
Puigortunngornermik eqqugaasut paatsiveeruteqqajaasinnaapput imaluunniit siusinnerusumut sanilliullugu allatut iliortalerlutik. Naqqissuineq aaqqiagiinninnermik aallartitsikkajuppoq toqqissisimajunnaartittarlugillu. Akerlianik suli ajunngitsut samminiarsarikkit, aamma iluatsitsineri mikingaluartulluunniit pillugit nersualaakkit. Taakkununnga ilinnullu pitsaanerusumik misigisaqartitsissapput.
Puigortunngorneq pillugu ilisimasatit annertusippata, pitsaanerusumik tapersersuisinnaalissaatit. Kalaallit Nunaanni kommunit ilaanni puigortunngortunut ataqatigiissaarisoqarpoq, siunnersuinermik tapersersuinermillu ikiuisinnaasut. Najukkami sunik neqerooruteqarnersoq misissoruk. Puigortunngortunut ataqatigiissaarisumik soqanngippat, peqqinnissaqarfimmi imaluunniit kommunimi amerlanertigut ikiorneqarsinnaavutit.