Puigortunngorneq pillugu nittartagaq pillugu tapiissuteqarnermut suleqatitsinnut qujanaq

Isumaginninnermut, Ilaqutariinnut, Suliffeqarnermut Nunamullu Namminermut Naalakkersuisoqarfik Puigortunngorneq pillugu nittartakkap saqqummiunneqarnera pillugu tulluusimaarpoq.

Naalakkersuisoqarfiup aamma Naalakkersuisup Jess Svanep nittartakkap ineriartortinneranut ilanngussanut tapersersuinermullu nalitoqisunut suleqatigut immikkut ittumik qujaffiginiarpaat. Pimoorussinngitsuuppata ilisimasaqanngitsuuppatalu suliniut manna piviusunngornavianngikkaluarpoq. Qujavugut ukununnga:

Danmarkimi Puigortunngorneq pillugu Ilisimasanik Ingerlatsivik
Rosemarie Elsner, puigortunngornermut ilisimasalik
Maybritt Lynge, Peqqinnissaqarfimmi nutserisoq
Jakob Vetterlain, Naalakkersuisoqarfimmi nutserisoq
Digitalinngortitsinermut Aqutsisoqarfik
Ole Gredahl, sianiutitsinnut nappaatinut immikkut nakorsaq
Goat Medie, nittarsaassinermut kiffartuussivik

Puigortunngorneq pillugu ilisimasanik katersuiffimmik nittartakkamik pilersitsiniarneq annertuumik suliaavoq, aamma suleqatitta paasisimasaat misilittagaallu assut iluaqutigaavut. Siunersiuinermik, imarisaanut suliaqarnermilu tapersersuinermik ilanngussaqarput, tamatumalu nittartakkap Kalaallit Nunaanni qanigisanut sulinermilu paasisimasalinnut siunnerfilimmik attuumassutilimmillu ilisimasanik neqerooruteqarnissaa qulakkeerpaa. Atortussat allaatigisat annertuut Danmarkimi Puigortunngorneq pillugu Ilisimasanik Ingerlatsivimmeersuupput tamatumalu kinguneraa atortussat allanngortillugit nunatsinnut pissutsinut naleqqussarneqartariaqarnerat.

Suleqatigiinnerup nanginneqarnissaanut aamma puigortunngornermik eqqugaasunik, qanigisaasunik paaqqutarinninnermillu sulisunik, ullut tamaasa annertuumik allannguisartunik, tapersersuisinnaasumik Puigortunngorneq pillugu nittartakkap imarisai suli amerlaninngorlugit ingerlaavartumik ineriartortinnissaanut qilanaarpugut.