Rosemarie Elsner puigortunngorneq pillugu filmini tallimani nutaani ilisimasaminik avitseqatiginnippoq

Puigortunngorneq pillugu nittartakkap ulloq 1. januar 2025-mi atulersinneqarneranut atatillugu puigortunngornermik ilisimasalik Rosemarie Elsner peqatigalugu filmeraliat tallimat nutaat tamanit pissarsiarineqarsinnaalerput. Taakkua Isumaginninnermut, Ilaqutariinnut, Suliffeqarnermut Nunamullu Namminermut Naalakkersuisoqarfiup nittarsaassinermullu kiffartuussiviup, Goat Medie, akornanni suleqatigiillutik suliarineqarput.

Rosemarie Elsner sulinini tamaat Kalaallit Nunaanni puigortunngorneq pillugu paaqqutaqarnermik aallussaqarpoq suliassaqarfimmilu suliamut paasisimasalittut nunatsinni ilisimaneqarnerpaanut ilaavoq. Rosemarie Elsner 69-inik ukioqarpoq, peqqissaasutut ilinniagaqarluni, kisianni ullumikkut soraarneruvoq Nuummilu ilaquttanilu najugaqarluni.

1990-imiit 1998-imut Nanortalimmi utoqqaat illuanni forstanderiuvoq aamma 1998-imiit 2017-imut Nuummi utoqqaat illuanni forstanderiulluni. Peqqissaasutut ukiut 40-inngortorsiorpoq, ukiullu amerlanerpaat utoqqarnut suliassaqarfimmi sulilluni. Ukiuni taakkunani paaqqutarinninnermik sulisut, innuttaasut qanigisallu ilinniartittuarpai. Kalaallit Nunaanni utoqqarnik paaqqutarinninneq puigortunngornerlu pillugit annertuumik ilisimasani ineriartortippai aamma isumassuineq puigortunngornerlu pillugit marlunnik atuakkiaqarluni. Atuakkat eqqaamasaqartitsiniaanermut tunngapput, puigortunngornermik eqqugaasut eqqaamasatik uteqqillugit eqqaamaniarsinnaallugit.

"Puigortunngornermik eqqugaasunik inuunera tamakkerlugu sulininni misilittakkakka pillugit avitseqatigisinnaagassi nuannaarpunga. Misigivunga, ilisimasarpassuakka avitseqataaffiginerisut allanngueqataasinnaallunga. Ilisimasat pillugit katersuiffimmik ukiuni amerlasuuni amigaateqarpugut, taamaattumik puigortunngorneq pillugu nittartagaq manna assut pisariaqarpoq”, Kalaallit Nunaanni puigortunngorneq pillugu nittartagaq siulleq pillugu Rosemarie Elsner oqarpoq.

Filmeeqqani tallimani maannakkut Puigortunngorneq pillugu nittartakkamiilersuni, Elsnerip puigortunngorneq pillugu ersiutit siusissumik takuneqarsinnaaneranniit ulluinnarni paaqqutarinninnermik isumassuinermillu periusissianut tigussaasunut misilittakkaminik siunnersuutiminillu avitseqataavoq. Filmeeqqat ineriartortinneqarput qanigisat paaqqutaqarnermillu sulisut suliaqarnermut paasinninnermullu nunatsinni pissutsinut naleqqussakkanik pissarseqqullugit.

Rosemarie Elsner puigortunngorneq pillugu ilinniartitsiniarluni paasititsiniaaniarlunilu Kalaallit Nunaat tamaat angalasarsimavaa, aamma Puigortunngorneq pillugu nittartakkamut ilanngussaqarnera puigortunngornermik eqqugaasut qanigisaallu tapersersorneqarnissaannut suliaqarnerani alloriarneruvoq pingaaruteqartoq.

Rosamariemut pingaarluinnarpoq puigortunngornerup tunuaniittoq inuup takuneqarnissaa, nappaat kisiat isiginagu.