Puigortunngorneq pillugu nittartagaq pilersinneqarpoq

Suliniut manna Naalakkersuisut utoqqaat pillugit periusissiaanniit aallaaveqarpoq, erseqqinnerusumik immikkoortoq 7, Inatsisartunit akuersissutigineqartoq. Puigortunngorneq pillugu nittartakkap siunertaraa puigortunngorneq pillugu ilisimasat pingaaruteqartut qanigisanut suliamullu paasisimasalinnut, Kalaallit Nunaanni puigortunngornermik eqqugaasunik suliaqartunut, pissarsiarineqarsinnaasunngortinnissaat.

Kalaallit Nunaanni utoqqaat amerliartuinnarput taamaalillutillu puigortunngornermik eqqugaasut aamma amerliartorlutik. Taamaattumik inuiaqatigiinni inuuneqqortusineq malillugu suliassaqarfimmi sakkussanut ilisimasanullu pisariaqartitsineq annertusiartuinnarpoq.

Puigortunngorneq pillugu nittartakkami paasissutissat isumalluutillu nutartikkat katersorneqarput, inuit puigortunngornermik eqqugaasut, kiisalu qanigisat aamma sulinermik inuussutissarsiutillit, isumassuinermik suliaqartut, tapersersorsinnaalerlugit. Nittartakkami atortussat allaatigisat videoliallu nassaassaapput, aamma atortussanik nutaanik ingerlaavartumik ilanngussisoqartarumaarpoq, nunatsinni pissutsinut pisariaqartitanullu naleqqussagaasunik.

”Puigortunngorneq pillugu nittartagaq puigortunngornermik eqqugaasunut qanigisanullu Kalaallit Nunaanniittunut allannguissaaq. Kissaatigaarput nittartagaq toqqissisimanartuussasoq paasissutissiissutillu paasiuminartuussasut, tapersersuineq siunnersuinerlu pillugit nassaarineqarsinnaallutik” Isumaginninnermut, Ilaqutariinnut, Suliffeqarnermut Nunamullu Namminermut Naalakkersuisoq, Jess Svane oqaaseqarpoq.

Nittartagaq isumalluutaavoq, siunissami Kalaallit Nunaanni tamanut pissarsiaqarfiusinnaasoq. Maani puigortunngorneq pillugu ersiutit, katsorsaanermut periarfissat ulluinnarnilu iliuuseqarfiginissaanut sakkussanik paasisaqarfiusinnaavoq. Pingaartumik qanigisat paaqqutarinninnermillu suliallit tapersersuinermik tigussaasumik nassaarsinnaapput, puigortunngorneq pillugu unammilligassat pillugit ujarlernermi ikiuutaasinnaasut.

Puigortunngorneq pillugu nittartagaq Danmarkimi Puigortunngornermik Ilisimasanik Ingerlatsivik  (Videnscenter for Demens), sianiuteqarfitsigut nappaatinut immikkut ilisimasalik Ole Gredahl, Rosemarie Elsner, Digitalinngortitsinermik Aqutsisoqarfik, Goat Medie nittarsaassinermut kiffartuussivik aamma nutserisut Maybritt Lynge aamma Jakob Vetterlain.

Puigortunngorneq pillugu nittartagaqalernikkut Naalakkersuisut Kalaallit Nunaanni puigortunngornermik eqqugaasunut avatangiisiinullu annertunerusumik ilisimasanik pitsaanerusumillu tapersersuinermik qulakkeerinissamut pingaarutilimmik alloriarput.


Attaveqarfissaq:
Isumaginninnermut, Ilaqutariinnut, Suliffeqarnermut Nunamullu Namminermut Naalakkersuisoqarfik 
Naalakkersuisut