Piviusunik piviunngitsunillu immikkoortitsisinnaannginneq tusaasuusineq/takorruuineq

Piviusunik piviunngitsunillu immikkoortitsisinnaannginneq tusaasuusinerlu/takorruuinerlu inuit puigortunngortut ilaannit misigineqartarput.

Piviusunik piviunngitsunillu immikkoortitsisinnaannginneq tassaavoq isumassarsiat misigisallu piviunngitsut, puigortunngortumiilli ilumoortutut misigineqartut. Tamakku ilaatigut tassaasinnaapput tunngavissaqanngitsumik allat ajortumeeriniarsinnaanerannut imal. pigisanik tillinniarsinnaanerannut siooraneq.

Tusaasuusineq/takorruuineq tassaapput puigortunngortup kisimi misigisai. Ass. inunnik uumasunilluunniit takusuusineq imal. inuit nipaannik tusaasuusineq.

Piviusunik piviunngitsunillu immikkoortitsisinnaannginnermut assersuutit

Inuit puigortunngortut assigiinngitsorpassuarnik- iluaakkajuttunik naalliunnartunillu piviusuusorinnissinnaapput. Ilaat ass. pigisaminnik tillittoqarnerarlugu imal. toqqorterisoqarnerarlugu pasilliiniartunngortarput. Ilaasa ningarneq /sangianneq nappaasiuttarpat aappartillu allalerisutut pasilersarlugu. Allat, nalunngisamik tamarmik qimanniaraatsik takorluulersarpaat. Takorluukkat tunngavissaqannginnerannik inuup puigortunngortup paasitinnissaa ajornakusoorsinnaavoq ajornavissinnaalluniluunniit.

Allaasorinninneq

Inuit ilaat ass. naapitaq qanigisaasorisinnaavaat ilassinnginneralu eqqumiigalugu. Imal. qanigisamik arlaat assingusumik taarserneqarsimasoq misigisinnaavaat. Assingusoq ass. aapparisamut assingullunilu oqaluttoq- takornartaallunili. Inuup puigortunngortup tarrarsuummi tarrani allaasorisinnaavaataaq.

Tusaasuusinermut/takorruuinermut assersuutit

Tusaasuusineq takorruuinerlu nalinginnaanerpaapput. Inuup puigortunngortup- soqanngikkaluaq ass. inuk uumasorluunniit inimi takusinnaavaa. Taanna tassaasinnaavoq inuk toqoreersoq imal. maqaasisaq imal. uumasuutigisimasaq. Inuk puigortunngortoq, nipinik imal. oqaluppaluttunik piviunngitsunik-nassuiarneqarsinnaanngitsunik- tusaasaqarsinnaavoq.

Patsisaasoq

Inuit puigortunngortut puigutuujugajummata, nalinginnaasumik oqaloqatigiinnerni malinnaasinnaanerat ajornakusoorsinnaavoq. Tamanna toqqissiunnaarnermik paatsiveerusimanermillu kinguneqarsinnaavoq.

Piviusunik piviunngitsunillu immikkoortitsisinnaannginneq isumaqalersitsiniarnerusinnaavoq paatsiveqannginnermillu aaqqiiniarnerusinnaalluni. Arlaat sumut ilisimallugit puigorsimagaanni tiguneqarsimanissaat ilimagineqarsinnaavoq imal. piaaraluni toqqorneqarsimasorineqarsinnaallutik.

Paasinnissinnaanerup isumaqalersitsisinnaanerullu ajornakusuulernerat, puigortunngornerup aamma nassatarisinnaavaa. Ilisimaarilluakkat inuillu- allatut isikkoqaleriataartarput imal. allatut nipeqalersarlutik. Inuit puigortunngortut inunnik allaasorinnikkajunnerat imal. ilisariuminaatsitsisarnerat, tamatumunnga immaqa nassuiaataasinnaavoq.

Qanoq iliortoqarsinnaava?

Nakorsat, piviusunik piviunngitsunillu immikkoortitsisinnaannginnermut tusaasuusinermut/takorruuinermut nalinginnaasumik nakorsaasiuttagaat, inummut puigortunngortumut iluaqutaanermiit ajoqusiinerat annertunerusinnaagajuppoq. Psykosertunut nakorsaatit navianaatilinnik kingunerluuteqarsinnaammata, allamik periarfissaqannginnermi- ass. inuk puigortunngortoq annertuumik naalliuuteqarpat imal. imminut allanilluunniit navianartorsiortitsippat, aatsaat atortariaqarput.

Siunnersuutit pitsaasut

Misigisat qulareqinagit. Piviusunik piviunngitsunillu immikkoortitsisinnaannginnerup tusaasuusinerup/takorruuinerup puigortunngortumut piviusutut misigineqarnerat akueriuk.
Allamut saasarniarsariuk. Oqaloqatigiinneq soqutigisartagaanut nalinginnaasunut saatinniarsariuk.
Peqatigiillusi sammisaqarnissassinnik- ass. pisuttuaqatigiinnissamik, pinnguaammik pinnguarnissamik, nipilersukkanik tusarnaarnissamik, kaffisoqatigiinnissamik imal. ilaqutariit assiutaannik isiginnaarnissamik neqeroorfigiuk.
Piviusunik piviunngitsunillu immikkoortitsisinnaannginnerit eqissiunnaarnermik annilaanganermillu nassataqanngitsut, sammivallaaqinagit.
Piviusunik piviunngitsunillu immikkoortitsisinnaannginnermi misigissutsit paasiniarsarikkit akueralugillu. Inuk puigornermik nappaateqartoq toqqissisimanngippat imal. ernumappat, toqqissitinniarsaralugulu eqqissitinniarsariuk.
Init qaammaarissut, inuttaanut puigortunngortumut naammattunik sammisaqarfiullutillu misigisaqarfiusut ajornartorsiummik annikillisitsinissamut iluaqutaasinnaapputtaaq.

Najukkami saaffissat/attavissat: